Terror Attack at Dombivli Station: टेरर ऍटॅक ऍट डोंबिवली स्टेशन

अभिषेक ठमके यांचे ई-साहित्य क्षेत्रात आजवर अनेक साहित्य प्रकाशित झाले आहेत. त्यापैकी ३ कादंबऱ्यांना आंतरराष्ट्रीय स्तरावर पुरस्काराने गौरवण्यात आले आहे. अँड्रॉइड ऍप क्षेत्रात देखील भरीव कामगिरी करत प्रकाशित सर्व साहित्य उत्तम रेटिंगनुसार आंतरराष्ट्रीय गुगल ऍप यादीमध्ये पहिल्या १०० साहित्यामध्ये समाविष्ट झाले आहेत.Wettapad या इंग्रजी साहित्याची मक्तेदारी असणाऱ्या लायब्ररीमध्ये मराठी साहित्य (पुन्हा नव्याने सुरुवात) सलग दोन महिने पहिल्या २० साहित्यांमध्ये होते. कवितासागर प्रकाशनाद्वारे त्यांची ‘पुन्हा नव्याने सुरुवात’ ही कादंबरी एकाच वेळी १२ संकेतस्थळावर प्रकाशित करण्यात आली. तरुण मराठी वाचक मराठी साहित्याकडे आकर्षित व्हावा यासाठी प्रत्येक कादंबरी प्रकाशित होण्याआधी ट्रेलर प्रकाशित करण्यात ते यशस्वी झाले. सोशल मिडीयावर अल्पावधीत लोकप्रिय झालेले मराठीतील लेखक त्यांच्या ई-दिवाळी अंकासाठी देखील तेवढेच लोकप्रिय आहेत. जगभरातील लेखकांचे साहित्य समाविष्ट करून आपला ई-दिवाळी अंक ६३ देशांमध्ये पोहोचवून परदेशातील मराठी वाचकांसाठी व्यासपीठ उपलब्ध करून देण्यात ते यशस्वी ठरले. आरंभ या मराठीतील वेगळ्याच ई-मासिकाद्वारे वाचकांचा कल ई-साहित्याकडे वळवण्याचा त्यांचा प्रयत्न आहे. अँड्रॉइड ऍप आणि ई-पुस्तक स्वरुपात त्यांचे ई-मासिक उपलब्ध होत आहे.

लेखनशैली: अभिषेक ठमके हे मराठीतील साय-फाय लेखक या नावाने देखील प्रसिद्ध आहेत. वैज्ञानिक दाखले देत त्यांनी आपल्या अनेक साय-फाय प्रकारातील मराठीतील दुर्मिळ कादंबऱ्या प्रकाशित केल्या आहेत. कादंबरीच्या कथेला विज्ञानाचा संदर्भ असल्याने विशेषतः तरुण वाचकांचा कादंबरी वाचण्याचा कल वाढत आहे. त्यांच्या प्रत्येक पुस्तकांमधून वाचकांना काही ना काही शिकता यावे यासाठी वर्षभर त्या विषयावर अभ्यास करून / प्रस्तुत विषयांशी संबंधित व्यक्तींना भेटून ते संशोधन करतात आणि वाचकांना सोप्या भाषेत विज्ञानाचे दाखले देत कादंबरी लेखन करतात. त्यांची पुस्तकं मुख्यतः वैज्ञानिक, लष्कर, पोलीस आणि संशोधकांवर आधारित असतात.

मराठी साहित्यातील प्रयोग: संयुक्त महाराष्ट्र लढ्यामध्ये मराठी साहित्यिकांचे योगदान मोलाचे होते, त्या साहित्यीकांना श्रद्धांजली म्हणून दरवर्षी १ मे रोजी ते आपले पुस्तक प्रकाशित करतात. त्यांच्या ‘मैत्र जीवांचे’ या कादंबरीने गुगल प्ले स्टोरवर १,००,००० वाचकांचा टप्पा ओलांडला होता. मराठी वाचकांना ब्लॉगलेखन करता यावे यासाठी त्यांनी आपले दुसरे पुस्तक अग्निपुत्र विविध भागांमध्ये ब्लॉगवर प्रकाशित केले, ज्यामध्ये त्यांच्या ब्लॉगला कादंबरी पूर्ण होण्याआधीच ४,००,००० पेक्षा जास्त वाचक लाभले. पुन्हा नव्याने सुरुवात ही कादंबरी त्यांनी एकाच वेळी १२ संकेतस्थळांवर प्रकाशित केली. मराठीतील थोर विचारवंतांची माहिती तरुण पिढीला व्हावी यासाठी ‘महाराष्ट्राचे शिल्पकार’ हे अँड्रॉइड ऍप प्रकाशित केले, जे गुगल प्ले स्टोरवर आजदेखील उत्तम रेटिंगनुसार उपलब्ध आहे. योगासनांविषयी ई-साहित्य क्षेत्रात मराठीमध्ये पहिले अँड्रॉइड ऍप प्रकाशित केले. मराठीतील नवोदित लेखकांना हक्काचे व्यासपीठ उपलब्ध करून देत सर्वसमावेशक अर्थ मराठी ई-दिवाळी अंक आणि आरंभ ई-मासिक सुरु केले.